O PSOE de Rianxo, a través do seu voceiro Óscar Rial, presentou unha proposta dirixida ao Goberno local na que manifesta a súa “profunda preocupación pola situación de falta de conciliación pola ausencia de Plan Madruga, derivada da non aplicación dos criterios flexíbeis, e que reclamaban as anpas do noso concello”. No comunicado os socialistas recoñecen “entender que a conciliación entre a vida laboral e familiar é un dereito fundamental para todas as familias e un deber das administracións públicas asegurar as condicións necesarias para que isto sexa posíbel”. Porén, din, a día de hoxe “non se teñen adoptado no Plan Madruga as medidas necesarias para a súa implementación no Colexio Brea Segade”.
Opinan que “esta falta de acción” está “a afectar as familias do noso municipio, que atopan enormes dificultades para compatibilizar as súas obrigas laborais e a atención aos seus fillos e fillas, e cando podían ver unha posibilidade de conciliación, a súa postura innegociábel leva a estas familias a estar sen este servizo”. Por estes motivos o PSOE solicita o seguinte ao Concello: a implementación inmediata do Plan Madruga no Colexio Brea Segade; a eliminación das ratios mínimas durante este primeiro ano de posta en marcha do plan; a creación de espazos accesíbeis, así como a previsión de formación para o persoal encargado de atender as posíbeis necesidades educativas dos nenos e nenas inscritos ou que poidan inscribirse no futuro; a flexibilización das inscricións, permitindo a opción de elixir días soltos; e a flexibilización dos pagos, permitindo tramos horarios que se adapten mellor ás necesidades das familias.
Esixen tamén ao grupo de Goberno que teña en consideración estes aspectos e “reconsidere a súa postura para favorecer a conciliación familiar no Colexio Brea Segade”.
