A directora de Relacións Externas da empresa CONGALSA, Isabel Cañas, recolleu na mañá deste 3 de setembro o premio que a Xunta de Galicia concedeu á compañía alimentaria da Pobra do Caramiñal ao abeiro dos cuartos Premios de Sustentabilidade Empresarial de Galicia, na categoría de gran empresa.
O evento, presidido polo conselleiro de Emprego, Comercio e Emigración, José González, serviu para recoñecer as boas prácticas implantadas en materia laboral, ambiental e social, así como o fomento da conciliación e a corresponsabilidade.
Isabel Cañas reivindicou o papel que deben ter as empresas para xerar impacto positivo na sociedade e sinalou que “para CONGALSA é un enorme orgullo recibir este recoñecemento que pon en valor o esforzo que facemos cada día ao apostar pola promoción do respecto ao medio ambiente e o desenvolvemento comunitario co obxectivo de ser parte activa da sociedade.”
Así mesmo, manifestou que o compromiso e as persoas son dúas das palabras chave que “nos definen como empresa e que serven de faro cando poñemos en marcha algún dos múltiples programas de desenvolvemento laboral, de coidado ambiental e de integración social. No corazón de cada empresa comprometida están as persoas. Son elas quen, co seu esforzo diario, a súa creatividade e a súa paixón, materializan os valores que hoxe celebramos”, concluíu.
Ao mesmo tempo felicitou ás outras empresas premiadas, Club Celta de Vigo, premiado na categoría de mediana empresa e Aplicacións de Bombeo Industrial, distinguida polo seu papel no ámbito da conciliación.
