O segundo tenente de Alcalde, Francisco Suárez-Puerta xunto con Montse Vila, responsábel da Asociación de Saúde Mental A Creba presentaron o programa do certame solidario Tolemias Hailas, que inclúe unha serie de conta contos e un concerto para o vindeiro sábado 7 de setembro ás 12:30 h na praza da Porta do Sol.
A iniciativa da asociación ten como obxectivo dar a coñecer o traballo que desenvolven así como o de sensibilizar á veciñanza da problemática crecente que existe neste senso, o da saúde mental.
Montse Vila informou das accións que están levando a cabo dende esta asociación que leva 30 anos traballando no eido da saúde mental, creando diferentes programas e dando múltiples servizos ás persoas con problemas de saúde mental, familias e achegados. Vila argumentou que a prevalencia da saúde mental é “maior da que a maioría da poboación coñece” e de feito “considérase que unha de cada catro persoas presenta ou presentará un problema de saúde mental ao longo da súa vida”, sinalou, engadindo que “tamén temos o estigma que atopamos coas doenzas mentais, hai moitos falsos mitos e prexuízos con referencia ao trato que se lle da ás persoas con problemas de saúde mental; polo que nos pareceu moi interesante o de dar a coñecer esta problemática a pé de rúa dunha maneira máis distendida e non tan formal”.
Vila tamén agradeceu ao Concello pola súa constante colaboración, así coma aos artistas convidados e as empresas colaboradoras.
Suárez-Puerta agradeceu todo o esforzo que supuxo sacar adiante estas actuacións, o seu obxectivo de dar a coñecer tanto a asociación, “e como non, o seu traballo que é moi importante para Ribeira, que é un traballo non cuantificábel e que os resultados que teñen cos usuarios son moi bos; e podo dicilo en persoa porque estiven varias veces vendo como traballan e é de agradecer e moi necesario que haxa asociacións como esta” sinalou Francisco.
O concelleiro animou á veciñanza a asistir o sábado 7 a partires das 12.30 h ás actuacións de dous conta contos: Xanico & Jota e a Cándido Pazó; e para finalizar actuará o grupo de blues-rock e soul The Orphans.
