O Concello de Boiro convocou unha liña de axudas económicas de carácter non periódico dun importe total de 24.000 euros, destinadas a facer fronte a gastos específicos para persoas con recursos insuficientes. As bases reguladoras e toda a información sobre a convocatoria están dispoñíbeis na web municipal.
Segundo informaron fontes do Consistorio, a finalidade destas axudas é “dar resposta urxente a situacións puntuais de necesidade derivada de gastos específicos relativos a necesidades básicas como axudas económicas para respiro familiar e conciliación; reforzo da atención a persoas sen fogar que carezan de medios económicos; axudas para gastos de consumo enerxético a persoas en situación de vulnerabilidade”.
As persoas beneficiarias destas axudas deberán cumprir unha serie de requisitos tales como estar a unidade familiar empadroada no termo municipal de Boiro por unha antigüidade superior a 6 meses; que a unidade familiar non dispoña de ingresos suficientes tendo en conta o establecido nas bases; e escolarización e asistencia regular ao centro educativo das persoas que forman parte da unidade familiar.
As solicitudes deberán formalizarse presentando o modelo de solicitude e toda a documentación requirida mediante o Rexistro Xeral ou sede electrónica do Concello de Boiro. O prazo de presentación de solicitudes estará aberto ata o 15 de decembro ou ata esgotar o crédito establecido e o prazo de xustificación será ata o 31 de decembro.
