O Concello de Boiro colabora coa XXVIII regata crucero Cenor – Trofeo Concello de Boiro, que terá lugar os días 10 e 11 de agosto entre o Náutico de Portonovo e o Náutico de Barraña. O alcalde, José Ramón
Romero, participou esta mañá na presentación xunto co presidente do Club Náutico de Portonovo, Javier Ruíz de Cortázar, e o presidente do Club Náutico de Barraña, Jesús Babío.
Está prevista a participación dunhas 25 embarcacións e máis de 60 persoas que chegarán o sábado a Boiro e participarán neste Trofeo Concello de Boiro. “Dende o Concello apostamos polo turismo náutico e esta é unha das citas máis importantes do ano xa que se vai consolidando e contribúe á promoción do deporte da vela, do náutico e de Boiro como destino turístico”, recoñeceu o alcalde.
A regata está dividida en catro categorías, dúas para barcos ORC, solitario e clásicos e veteranos. “Trátase dunha regata moi tranquila, dunhas 18 millas de ida e outras tantas de volta, na que participan moitas
familias porque buscamos potenciar as saídas dos barcos da propia ría”, afirmou Javier Ruíz de Cortázar.
A regata sairá arredor das 14.00h do Náutico do Portonovo para chegar a Barraña sobre as 19.00 horas, cando se fará a entrega do Trofeo Concello de Boiro, e volverá saír do Náutico de Barraña cara Portonovo o domingo ás 11.00 horas. “Para o Náutico de Barraña é un pracer acoller un ano máis esta regata, nesta ocasión dun xeito especial pois imos inaugurar tamén as novas instalacións do club, moi necesarias para prestar servizo
aos nosos usuarios”, recoñeceu Jesús Babío.
