O catedrático de Filosofía do Dereito da Universidade de Santiago de Compostela (USC) Francisco Puy Muñoz faleceu aos 88 anos de idade.
O tamén escritor e político foi membro en representación de Alianza Popular na coñecida como Comisión dos 16, os inspiradores intelectuais do actual Estatuto de Autonomía de Galicia.
Nado en Cambil (Xaén), Puy Muñoz estivo casado con Rosario Fraga –falecida en 2018–, irmá do expresidente da Xunta Manuel Fraga, e era pai de sete fillos, entre eles o deputado popular no Congreso Pedro Puy Fraga.
Doutor en Dereito pola Universidade de Granada (España), era autor de máis de medio cento de libros.
Francisco Puy obtivo a cátedra de Filosofía do Dereito en 1966 por concurso nacional na Universidade de Santiago de Compostela, onde desenvolveu o seu labor docente e investigador durante máis de 40 anos ininterrompidos. Nesta universidade dirixiu múltiples teses de doutoramento.
Foi director de departamento e investigador principal de varios proxectos de investigación financiados en convocatorias públicas. Pasou a ser catedrático emérito ad honorem permanente.
Igualmente, foi académico de número da Real Academia Galega de Xurisprudencia e Lexislación. Foi doutor honoris causa e magister honoris en diferentes universidades.
Entre outras facetas, Francisco Puy foi concelleiro en Santiago nos anos setenta e foi fundador da Fundación Alfredo Brañas.
