A peña Os Luns ao Sol organiza nesta semana o X Encontro Gastrocultural entre Eltziego (Áraba, Euskadi) e Boiro, que terá a súa actividade principal coa degustación o sábado 27 de xullo de 2024 ás 21.00 horas na rúa peonil (doutor Santos Mieites). O alcalde, José Ramón Romero; participou na presentación do encontro xunto con Quin Riveiro e Jesús Manuel García, da devandita peña.
A expedición, composta por 45 persoas encabezadas polo alcalde de Eltziego, Juan Carlos Uribe, chegará a Boiro este xoves 25 de xullo e participará nunha recepción institucional na Casa Consistorial na que participará o alcalde boirense, José Ramón Romero, para seguidamente desprazarse ao piñeiral de praia Xardín onde terán unha cea informal.
O programa do venres 26 contará cunha visita ao Concello de Betanzos, que inclúe unha recepción na Casa Consistorial e unha visita guiada polo núcleo da localidade. Ademais, as e os participantes terán un xantar antes de regresar a Boiro, onde terán un xantar de confraternidade.
O sábado pola mañá realizarán unhas visitas en barco pola ría para coñecer o proceso de extracción do mexillón e visitar a illa de Rúa e o Areoso. Pola tarde, a partir das 21.00 horas na rúa peonil terá lugar a degustación de guiso rioxano maridado con viño rioja DOP ou auga. A degustación terá un prezo da ración de 4 euros, donativo para Cáritas Boiro. A xornada contará co acompañamento musical de A Dorniña de Abanqueiro.
