A mala previsión meteorolóxica para estes días obriga a facer cambios na axenda da Semana do Mar 2024, segundo confirmou o Concello da Pobra.
Deste xeito, o espectáculo infantil Abordaxe pirata, de Barafunda Teatro, previsto para a tarde deste luns 8, cancélase; mentres que a mostra e degustación culinaria en base á conserva, con Miguel Mosteiro, programada para o día 9 se traslada ao 29 de xullo. A hora e o lugar mantéñense: ás 20.00 horas, nos Xardíns de Valle-Inclán.
A Semana do Mar é unha iniciativa da Concellaría do Turismo que busca exaltar a tradición mariñeira da localidade dende diferentes perspectivas e que nesta convocatoria conta cunha exposición, gastronomía, un taller e a feira mariñeira.
