Esta semana inaugurouse o programa de visitas guiadas polo centro histórico de Noia que organizan a patronal Noia Histórica e máis as áreas de Turismo, Comercio e Cultura do Concello. Na posta en marcha da edición 2024 desta iniciativa estival participaron a presidenta de Noia Histórica, Alba Expósito Juanatey, e o concelleiro José Pérez Martínez, acompañados da guía oficial, Iria Caamaño, e dalgún dos turistas que participaban nos roteiros guiados deste xoves 4 de xullo.
As visitas, que terán unha duración de 1 hora e media, celebraranse os xoves e venres de xullo e agosto e teñen un custe de 3 € que se pode trocar nas empresas de hostalería de Noia Histórica. Serán, polo tanto, “de balde para o turista”, sinalaron na presentación, salientando este aliciente de gratuituidade, “un elemento exclusivo do programa, xa que hoxe en día”, explicaron, “en calquera municipio ou servizo turístico, todo ten un custe alto para os visitantes e non é recuperábel”
A asociación Noia Histórica leva 18 anos programando visitas guiadas á vila poñendo en valor a riqueza patrimonial e histórica da vila e a súa contorna e a súa vinculación co camiño xacobeo.
