O Concello de Boiro recibe da Dirección Xeral de Emerxencias e Interior da Xunta de Galicia unha subvención para a adxudicación de equipamentos de emerxencias. O alcalde, José Ramón Romero, xunto co coordinador de Protección Civil de Boiro, Ignacio Pérez, participaron na mañá deste 4 de xullo no acto de recepción do material.
Trátase de recursos para a Agrupación de Voluntarios de Protección Civil de Boiro: un kit de material loxístico de seguridade viaria que contén unha mampara de protección visual pregábel para protexer visualmente un espazo concreto en caso de accidentes; un soporte telescópico antivento e un pack de sinalización con sinais de sentido obrigatorio, advertencia, prohibido o paso…; 15 unidades de tetrápodos con reflectores; 1 maletín de balizas sincronizábeis; e 4 lanternas de sinalización para emerxencias.
O obxectivo da incorporación deste material “é facilitar as tarefas do servizo de Protección Civil e emerxencias tales como a atención en accidentes ou emerxencias de calquera tipo, asi como a colaboración e apoio en materia de seguridade en probas deportivas e outros eventos”, sinalou o Concello.
O servizo de Protección Civil e Emerxencias do Concello de Boiro conta na actualidade cunha vintena de voluntarios que atenden todo tipo de emerxencias producidas no termo municipal, así como colaboración en dispositivos de outros concellos para eventos e actividades deportivas ou culturais e incidencias solicitadas polo CIAE 112 ou as forzas e corpos de seguridade tales como incendios, accidentes de tráfico, procura de desaparecidos…
