O campo da festa de San Roquiño acolleu o pasado venres 28 de xuño unha homenaxe ao grupo de gaiteiros Os Pequenos de Tállara, organizada pola Asociación Cultural O Son do Pote e a UNED A Coruña, en colaboración co Concello de Lousame. Unha homenaxe na que tomaron parte Os Jaitas Blue, o grupo de gaitas da Sociedade Liceo de Noia, o grupo de pandeireta da UNED Sénior e o grupo de gaitas O Son do Pote.
O acto estivo presidido pola concelleira de Cultura, Silvia Agrafojo, quen asegurou que lembrar a persoas como Os Pequenos de Tállara supón facer “un exercicio de memoria moi necesario. Nunca podemos esquecer as nosas raíces e os nosos costumes. A nosa orixe é o que nos define como país e como persoas”. Ademais de pola edil de Cultura, o Concello de Lousame estivo representado polos concelleiros de Economía, Esteban Ares; Obras, Ramón Martínez; Deportes, Mariel Agrafojo Nieto; e Seguridade Viaria, Jose Antonio Ces Barreiro.
