O alcalde de Ribeira, Luís Pérez, xunto co segundo tenente de alcalde, desprazáronse á praia de Coroso para presentar o novo servizo de socorrismo para as praias do municipio, que comezará a operar desde hoxe co obxectivo de garantir a seguridade dos bañistas.
Francisco Suárez destacou o compromiso do goberno local de ampliar o número de socorristas. “Cumprimos con ese mandato que adquirimos ante a veciñanza de Ribeira”, asegurou. “Este ano, como novidade, temos o aumento de efectivos que pasa de 12 a 23 socorristas e aumentamos o número de praias vixiadas: Coroso, O Vilar, A Ladeira, Castro-Catía e Río Azor”.
O alcalde tamén se referiu á ampliación da tempada de socorrismo, que pasa de 2 meses e 10 días a 3 meses, mellorando así a seguridade nos areais. “Ribeira, por primeira vez, terá este servizo en activo de xuño a setembro”.
