Xa está dispoñíbel na Rede o documental Querida gaivota maldita!, unha curtametraxe divulgativa que busca concienciar
sobre a importancia ecolóxica da gaivota patiamarela, e que contou para a súa realización co apoio económico do Executivo autonómico.
Cómpre subliñar que a comunidade e, especialmente, os catro arquipélagos que conforman o Parque Nacional marítimo-terrestre das Illas Atlánticas de Galicia albergan unha das maiores colonias de cría desta especie, que nas últimas dúas décadas experimentou unha redución notábel no número de parellas reprodutoras. O documental explica con detalle os traballos de conservación da gaivota patiamarela realizados polo Parque Nacional —dependente da Consellería de Medio Ambiente e Cambio Climático—, centrados no seguimento das poboacións nas illas, na protección das zonas de cría e na loita e investigación contra a enfermidade descoñecida que as afecta desde hai uns anos, medidas coas que se pretende frear o seu declive.
A Consellería de Medio Ambiente explica que “de feito, estas aves mariñas son unha especie ameazada e bastante descoñecida a pesar da súa presenza habitual nos paseos marítimos e terrazas de todo o litoral galego e de que xogan un papel ecolóxico de grande importancia para os ecosistemas costeiros e a súa cadea trófica grazas, entre outras cuestións, á súa variada dieta”.
A través desta peza audiovisual, búscase, tamén, espertar conciencias para que o público en xeral descubra ás gaivotas patiamarelas, a importante función ecolóxica que cumpren e a necesidade de traballar entre todos na súa conservación e protección.
Axuda económica e divulgación vía Youtube
Producido por Ibis Natureza e Imaxe e dirixido por Manuel Pedrosa e Mariam Mariño, o traballo recibiu unha subvención de 18.000 euros da Consellería de Medio Ambiente e Cambio Climático, ao abeiro da convocatoria do ano 2023 das axudas para proxectos relacionados coa área de influencia socioeconómica do Parque Nacional marítimo-terrestre das Illas Atlánticas de Galicia.
Como dixemos, o vídeo xa está dispoñíbel para a súa visualización en liña na canle de Youtube oficial do Parque Nacional.
Amais, a curtametraxe Querida gaivota maldita! participará no concurso SunCine, un prestixioso festival internacional de cinema de temática medioambiental que este ano celebra a súa 31ª edición, o que o converte no certame máis antigo do mundo no seu xénero.
