Boiro acolle este mes de xuño unha nova edición, a XI, do Campus Obradoiro JEALSA de baloncesto, co apoio da conserveira local e máis do Concello boirense. Desenvolverase entre o 24 e o 28 de xuño. Na presentación da actividade, celebrada este 5 de xuño, participaron o concelleiro de Deportes, Marcos Fajardo; o director xeral do Obradoiro, Hector Galán; Guillermo Outeiral, do Club de Baloncesto Santa Baia; e Margarita Hermo, directora de Relacións Institucionais de JEALSA.
O Campus está destinado a rapaces e rapazas de entre 6 e 18 anos e vaise desenvolver nos pavillóns de Barraña, A Cachada, Santa Baia e Praia Xardín en horario de mañá e tarde. “Estas actividades teñen unha gran importancia e permiten que se manteña a actividade deportiva que se leva a cabo durante o curso escolar, combinada con outras propostas lúdicas”, sinalou o director xeral do Obradoiro, Héctor Galán.
Dende o Club Santa Baia agradeceron ao Concello de Boiro e JEALSA pola súa implicación na actividade deportiva do municipio e a confianza do Obradoiro, “que segue a contar co Santa Baia para desenvolver este campus e que demostra que Boiro é un referente e un atractivo para o deporte”.
Dende JEALSA, Margarita Hermo, fixo fincapé na “importancia das alianzas público-privadas para levar a cabo actividades como esta, pola que xa pasaron máis de 1.000 rapaces e rapazas que practican deporte e que medran en valores como o compañeirismo”.
Pola súa banda, o concelleiro de Deporte, Marcos Fajardo, afirmou que “para o Concello de Boiro é un orgullo apoiar propostas como estas que veñen dos clubs deportivos e que son sempre moi positivas para o noso concello e para os nosos rapaces e rapazas”.
O Campus ten un prezo de 150 euros para a actividade, 220 euros para aquelas persoas que elixan a modalidade de actividade e comida e 260 euros para actividade, transporte e comida. Ademais, haberá descontos para persoas federadas en baloncesto, abonados ou accionistas do Obradoiro CAB, para membros do CB Santa Baia ou empregados de JEALSA e xogadores da canteira do Obradoiro CAB.
As inscricións están abertas e poden facerse xa na web do obradoirocab.com, onde está dispoñíbel a ficha de inscrición e a información para aboar o pago da matrícula. Máis información tamén no 690 618 872 ou campusboiro@obradoirocab.com.
