50 empresas e servizos turísticos de Barbanza Arousa pasan a avaliación do sistema de calidade turística SICTED
50 empresas e servizos turísticos de 20 oficios diferentes superan a avaliación do ano 2024 do Sistema Integral de Calidade Turística en Destino, sumando 16 aos máis de 30 pioneiros que obtiveron o distintivo no pasado ano. Súmanse, ademais, novos oficios
como son seguridade cidadá, escola de españois para estranxeiros, camping, comercio e experiencias e talleres turísticos. Estes pasan a complementar aos que xa estaban como son aloxamentos rurais, bares e cafeterías, adegas, espacios escénicos
permanentes, guías de turismo, hoteis e apartamentos turísticos, museos e centros de interese turístico visitable, oficinas de información turística, praias, portos deportivos, restaurantes, taxis, transporte turístico, turismo activo e vivendas de uso turístico.
Co obxecto de implantar este distintivo, levouse a cabo a Mesa de Calidade, con representación dos 4 concellos, asociacións empresariais e persoal da Mancomunidade.
Na reunión da Mesa de Calidade, que tivo lugar no Auditorio de Ribeira, examináronse os resultados da implantación deste sistema que certifica a excelencia, con 50 empresas que superaron satisfactoriamente as avaliacións. Ademais destas avaliacións, as entidades cumpriron outros requisitos relacionados coa óptima xestión empresarial e dos servizos así coma a recepción de dúas Asistencias Técnicas Individuais, a participación en sesións formativas e asistencias técnicas colectivas.
GRUPO DE MELLORA NO MUSEO DE ARTES DO GRAVADO Á ESTAMPA DIXITAL
No marco deste proxecto realizouse tamén un Grupo de Mellora no Museo de Artes do Gravado á Estampa Dixital, servizo distinguido.
As empresas foron recibidas polo presidente da Mancomunidade e alcalde de Ribeira, Luis Perez Barral; o alcalde de Boiro, José Ramón Romero e a xerente da Mancomunidade, Fátima Cachafeiro.
Luis Pérez Barral, presidente, destacou a grande implicación das empresas e servizos do destino e tamén a colaboración público-privada para lograr situar o noso destino na excelencia nacional, como principal obxectivo da Mancomumidade.
A continuación, Fátima Cachafeiro explicou os proxectos da Mancomunidade; sumando así a implicación e cooperación entre as administracións e as empresas privadas.
Traballouse tamén nas ferramentas de dixitalización actuais de xestión comercialización empresarial.
Nesta xornada realizouse tamén un famtrip interno no Museo de Artes do Gravado á Estampa Dixital, organizado polo seu director, o historiador Xoán Pastor Rodríguez Santamaría. Estas viaxes de familiarización para as propias empresas e servizos dentro
do destino turístico responden ao obxectivo da Mancomunidade de que as propias empresas e servizos sexan prescriptores de Barbanza Arousa. Responde tamén ao fortalecemento de alianzas entre o propio sector.
SICTED
O SICTED é un proxecto de mellora da calidade dos destinos turísticos promovido pola Secretaría de Estado de Turismo co apoio da FEMP, que traballa con servizos turísticos de ata 36 oficios diferentes, podendo participar todos os establecementos que se
atopan no círculo do consumo do turista como transporte, aloxamento, restauración, comercio ou axencias de viaxes entre outras.
O obxectivo último é mellorar a experiencia e satisfacción do turista; mais para os servizos turísticos que decidan adherirse ofrece beneficios tales como mellorar a xestión interna, dispoñer dunha referencia para mellorar o seu traballo, incrementar a
cualificación do persoal, compartir experiencias con empresarios do mesmo sector, participar no maior proxecto de calidade turística desenvolto en España con máis de 9000 servizos turísticos participantes ou optar a un distintivo que acredita o nivel de
calidade turística, recoñecendo o esforzo realizado a nivel nacional e internacional.
