Este luns presentouse I Trofeo de Orientación do Concello de Ribeira, que se celebrará o vindeiro 1 de xuño. Participou na rolda de prensa o concelleiro de Deportes, Xabier Vidal, acompañado de a Javier Rico, Antonio Piñeiro, Maribén Sampedro, Moncho Sampedro e Gonzalo Prenlla. Vidal fixo saber que é “a primeira vez que se celebra unha proba destas características no concello” e que está organizado polos clubs da Universidade de Santiago de Compostela e a Asociación Arnela en colaboración coa Asociación de Veciños de Carreira. Celebrarase pola mañá no Monte de San Alberto e pola tarde na parroquia de Corrubedo.
En San Alberto disputarase a proba da XXIII Liga Galega de O-Pé; Campionato da Xunta de Galicia de Distancia Media 2024, que puntuará na II proba da Liga Transfronteiriza Galicia Norte de Portugal, e pola tarde en Corrubedo, a I Proba da V Liga Galega de Sprint; Campionato da Xunta de Galicia.
Segundo engadiu Vidal, trátase dunha actividade “de carácter moi familiar” que está vencellada ao medio ambiente e que engloba grupos de idade diferentes, implicando habilidades deportivas pero tamén técnicas e intelectuais.
Moncho Sampedro destacou o gran traballo da USC na elaboración do mapa de orientación do monte de San Alberto “moi axeitado para esta proba”.
O I Trofeo de Orientación do Concello de Ribeira promete ser un evento destacado no calendario deportivo da comarca que atraerá a orientadores de toda Galicia e comarcas limítrofes, fomentando o espírito deportivo, o compañeirismo e o respecto polo medio ambiente entre os participantes.
