Axentes da Policía Nacional adscritos á Comisaría Local de Ribeira, no marco dun dispositivo establecido para a prevención do tráfico e consumo de estupefacientes na vía pública, procederon á detención de dúas mulleres e un home como presuntos autores dun delito contra a saúde pública, na súa modalidade de tráfico de drogas.
No operativo establecido para o efecto, os axentes observaron circulando a bordo dun vehículo a estas persoas, que tentaron darse á fuga cando se lles deu o alto, logrando os axentes evitalo, non sen antes ser embestidos polo citado vehículo, o que provocou danos nun vehículo policial.
De seguido, os axentes procederon ao rexistro do vehículo, localizando nun habitáculo do mesmo, perfectamente oculto, un envoltorio plástico que contiña máis de 10 gramos de heroína. Ademais, no seu cacheo persoal localizaron 9 bolsiñas termoseladas que contiñan cocaína e heroína e outros envases plásticos que contiñan mestura de heroína e cocaína, así como diversos útiles para a preparación de dose para a súa venda, tales como recortes plásticos para o envasado en dose, útiles para manipulación de substancias, etc.
Así mesmo fóronlles intervidos máis de 200 euros, catro teléfonos móbiles e o vehículo.
Tras tramitarse as correspondentes dilixencias policiais, os detidos foron postos ao dispor do Xulgado de Instrución número Tres de Ribeira en funcións de garda.
