O Concello de Outes celebrou o pasado venres 17 de maio, Día das Letras Galegas, a gala da XXVIII edición do Certame Francisco Añón de Poesía. Foi un acto para celebrar “a nosa cultura” e “honrar a memoria do poeta máis senlleiro do concello”, sinalaron dende a Área de Cultura que dirixe Anxo Núñez.
Na cita fixéronse referencias á autora homenaxeada este ano, a poeta coruñesa Luisa Villalta, e fíxose entrega dos premios nas diferentes categorías así coma a presentación das obras gañadoras da edición anterior.
A gañadora da categoría de adultos na edición anterior, Naila González, presentou (De)catarse. O gañador desta sección na edición actual foi Vicente Vázquez con Oconto da leiteira. Vicente recibirá 1.500 euros en metálico ademais de ver publicada a súa obra. O xurado destacou da súa contribución estar “cargada de saber popular, cun estilo coherente e un aquel místico que supura naturalidade”. Ademais, concedeulle un accésit a Paulo Vilar por Un día de febreiro.
A vertente musical veu da man do dúo Dara e Manuel.
