Un equipo de científicos do Instituto Español de Oceanografía (IEO-CSIC) e do Grupo de Estudo do Medio Mariño (GEMM) de Ribeira anunciou o achado dunha nova especie de esponxa mariña en augas galegas.
A especie, bautizada como Biemna begonae en honra a Begoña Pérez Dieste (1965-2021), foi atopada por primeira vez na ría de Arousa utilizando técnicas de mergullo. Trátase dunha especie pertencente ao xénero Biemna, do cal só se coñecía unha especie en augas galegas e cinco en augas europeas.
Segundo Javier Cristobo, investigador do Centro Oceanográfico de Xixón e autor principal do estudo, a nova especie ten unha morfoloxía distintiva, con forma de coxín semiesférico e numerosas proxeccións tubulares que emerxen da base. Ademais, presenta un esqueleto característico formado por espículas silíceas diferentes a outras especies próximas.
Os exemplares foron atopados entre 20 e 30 metros de profundidade, en fondos duros detríticos, principalmente en superficies rochosas horizontais cubertas por finas capas de sedimentos. Os especímenes colleitados en xullo mostraron xemas reprodutivas ao longo das papilas.
Este descubrimento foi posible grazas á colaboración do Instituto Español de Oceanografía e o Grupo de Estudo do Medio Mariño, quen traballa en proxectos de investigación para estudar a biodiversidade bentónica na demarcación noratlántica e mellorar o coñecemento sobre a fauna mariña das costas galegas.
IEO-CSIC/GEMM
