Aprobados os días pasados os Orzamentos Municipais de Porto do Son, tal e como lembramos dende este medio, o Concello xa puxo en marcha o expediente de contratación de dúas relevantes iniciativas que en conxunto suman máis dun millón de euros de investimento. Un destes proxectos consiste en prolongar a mellora da eficiencia enerxética do alumeado público municipal, que inclúe a substitución de de máis dun milleiro de lámpadas por equipamentos LED, máis duradeiros, sustentábeis e eficientes. Estes traballos, apoiados con fondos europeos Next Generation, veñen cun investimento total de 532.610 euros, dos que 82.668 proceden das arcas municipais. Esta nova fase do proxecto abranguerá as parroquias de Miñortos, Goiáns, Nebra, Noal, San Pedro, Xuño, Baroña e Caamaño.
Por outra banda, o Concello activou o proceso de contratación para recuperar a Casa Ríos e convertela nun espazo de lecer para a mocidade e na nova sede dos plenos da Corporación, sendo a previsión, tamén, albergar entre os seus muros o Museo do Traxe. A contía destinada é de 504.396 euros. A transformación deste edificio, un dos grandes proxectos construtivos do Concello, será posíbel grazas a unha subvención do Ministerio de Transportes, Mobilidade e Axenda Urbana, ao abeiro do Programa de Impulso á Rehabilitación de Edificios Públicos (241.500 euros dos ditos fondos PIREP) e grazas tamén ás achegas do Instituto Galego de Vivenda e Solo, o IGVS (que contribúe co investimento restante).
A Casa Ríos é antiga casa mariñeira emprazada na avenida de Galicia e de importante valor histórico e patrimonial, catalogada no Plan Xeral de Ordenación Municipal, características que serán mantidas e potenciadas no proxecto (coa conservación da fachada tradicional mariñeira e dos muros exteriores, entre ouros elementos). O plan de traballo prevé concentrar a meirande parte dos traballos de remodelación no interior, poñendo o foco en recursos que garantan a sustentabilidade e accesibilidade do inmóbel.
