Por se foran pouco os estragos que ocasionan nas rías de Arousa e Muros-Noia os vertidos contaminantes e descontrolados que chegan a elas acotío a través dos ríos e regachos, as constantes choivas que estes días abaten de novo sobre o litoral galego -de xeito moi evidente no territorio que as devanditas rías abranguen- non axudan nin o máis mínimo á rexeneración dos parques de cultivo que con tanto esmero e esperanza resementaron os mariscadores nos areais desas rías tentando, unha outra vez, recuperar a capacidade marisqueira que tanto ben leva ás familias destas amplas comarcas.
Non teñen os mariscadores moita confianza non xa na recuperación do perdido, senón do que, días pasados, resementaron. Cada mañá ollan ao ceo por comprobar cal é o seu semblante; pero homes e mulleres que fían o seu día a día no que o traballo lles permite extraer deses areais, pouco, por non dicir nada, agardan desas sementeiras levadas a cabo pensando en respostas positivas para o próximo verán.
A choiva acumulada nos pasados e actuais días non espertan un só sorriso nas súas facianas. Máis ben traslocen un avesío futuro, que os leva a manter a convocatoria dunha nova mobilización -desta vez en Ribeira- para o 13 de maio ás 12,30 horas.
Reclaman, como xa fixeron o pasado martes en Pontevedra, un plan de rexeneración e saneamento das rías e un plan de continxencias que faga posible unha cobertura fiable fronte á incidencia a longo prazo dunha situación como a que se vive na actualidade, e que tanto o goberno central como o autonómico se impliquen verdadeiramente na problemática que lles afecta e que, ao mesmo tempo, lles permita dispor dunha cobertura fiable fronte a incidencias como as actuais. De aquí que entendan que o diálogo político entre as devanditas administracións sexa indispensable para superar esta problemática.
Xa o pasado martes uns catrocentos mariscadores se concentraron en Pontevedra para esixir á Xunta a posta en marcha de medidas contra a crise do sector, como consecuencia da mortaldade de ameixa e berberecho que se rexistra dende o pasado mes de outubro e a falta de cría de moluscos, malestar que se expresaba nídiamente nunha pancarta coa lenda “Na defensa do noso mar”, que non era outra cousa ca expresión do compromiso dos mariscadores neste eido.
