Os populares de Ribeira, a través do concelleiro Emilio Pérez Outeiral, presentaron unha moción para ser tratada no vindeiro pleno da Corporación relativa ás columbarias e ás novas alternativas de soterramento de restos mortais. Segundo se fai saber na proposta, as columbarias (conxuntos de nichos) son un tipo de enterramento recente, xa que a cremación foi recoñecida como opción hai solo 60 anos, que cada vez está gañando máis popularidade en parte debido ás vantaxes que ofrece: os columbarios están construídos con materiais que non requiren un coidado constante e, ademais, ao conter so cinzas non poñen en risco a saúde publica e mesmo pódense construír en calquera espazo público ou privado”. Os populares din que tamén medra a súa presenza pola saturación á que se ven sometidos os nosos cemiterios provocada. E engaden: “Ante o crecente número de persoas que deciden optar pola incineración, o Grupo Municipal do Partido Popular propón un proxecto no que xa viña traballando dende hai tempo, dende a pasada lexislatura, e que contemplaba a súa creación ante a demanda que xeraba este servizo inexistente no noso municipio”.
Trátase, explica o concelleiro, “dunha modalidade que ademais de supoñer unha comodidade para as familias é tamén máis asumíbel; constitúe tamén unha alternativa cada vez máis estendida e practicada que non precisa da posesión nin de nicho nin de panteón para enterrar aos seres queridos, e dos que moitas familias non dispoñen”.
O grupo sostén que as obras que correspondería facer en Ribeira e tamén en Palmeira “poderían levarse a cabo en fases, realizándose en unidades e dependendo da demanda que puidera existir en cada momento podendo ser ampliados nun futuro no caso de que fose necesario”. O grupo destaca “o o valor engadido que supón dispoñer dun columbario en dúas das parroquias do noso municipio como son Ribeira e Palmeira para os nosos defuntos, un servizo que se prestaría en consonancia coas actuais tarifas que se pagan polos nichos e panteóns”.
É por iso que solicitan:
1- A posta en marcha dun proxecto que contemple a creación de columbarios nos cemiterios municipais de Ribeira e Palmeira como unha opción para poñer a servizo da veciñanza, no mesmo réxime no que se xestionan os nichos e panteóns.
2- Que tendo coñecemento do proxecto que foi proposto pola parroquia de Ribeira para darlle un uso comunitario e así impulsar a recuperación dunha zona céntrica como é a do Sagrado Corazón de Xesús, nas inmediacións do Monumento, se abra un diálogo para consensuar unha fórmula que recolla as inquedanzas de todas as partes interesadas.
