A Casa da Cultura de Boiro vai dar acollida este venres 26 de abril á representación teatral de Deadpan Karaoke, a cargo de Ibuprofeno Teatro, a partir das 21.00 horas.
As entradas estarán á venda dende unha hora antes da función na billeteira.
Trátase dunha peza para público adulto dirixida por Patricia Rodríguez e escrita por Patricia Rodríguez e Marián Bañobre.
O título é unha mestura de Deadpan, que en inglés significa “cara morta, baleira de expresión, imperturbable”, e Karaoke, do xaponés Kara (baleiro) e oke (orquestra).
Deadpan Karaoke é un espectáculo unipersoal de carácter participativo que propón como ingredientes principais o absurdo, a estupidez, a sorpresa, a comedia, a música e o cine, e que trata de dar resposta á pregunta: é posible o amor nesta sociedade tardocapitalista na que vivimos?
Deadpan é un personaxe incapaz de sentir e expresar emoción. A través das súas accións e grazas á contextualización das mesmas dentro dun karaoke, consegue facer accesíbeis e divertidas para o gran público cuestións e dilemas que ocupan aos grandes pensadores contemporáneos.
