Novamente a Plataforma Stop Desafiuzamentos Barbanza (Stop Deshaucios Barbanza) volve poñer o foco nunha das realidades máis dramáticas destes tempos de suposto progreso e suposta calidade de vida: nunca antes houbo tanta vivenda dispoñíbel nos nosos concellos e sen embargo non paran de medrar os casos de familias que non teñen acceso a unha solución habitacional ou perden aquela da que dispuñan. Desta volta a plataforma pon o foco no caso dunha familia monoparental de Boiro, unha nai e o seu fillo menor de idade, que están a loitar para evitar un desaloxo por falta de pagamentos de alugueiro, ben para poder manterse na vivenda ou que a Administración autonómica lles garanta unha alternativa habitacional, unha opción que a plataforma lembra que é legalmente obrigatoria a ser unha familia vulnerábel e en risco de exclusión social. “Con esta alternativa”, sinalan dende Stop Desafiuzamentos, “a propiedade do inmóbel en cuestión pode ter garantida a renda e recibir o importe mensual da propia Xunta de Galicia, unha vez interposta a demanda por desaloxo”. A entidade social fai un chamamento á Administración autonómica para que xestione coa maior premura a correspondente alternativa habitacional, unha cuestión na que segundo lembra a plataforma, tamén está a traballar a Concellería de Servizos Sociais do Concello de Boiro.
