A deputada de Mar e Medio Rural da Deputación da Coruña, Cristina Capelán Cancelo, está a visitar as confrarías de pescadores/as e mariscadores/as da provincia para ter información de primeira man acerca da situación e as problemáticas que lles afectan. Esta semana a deputada provincial fixo parada en Rianxo e mantivo unha xuntanza co alcalde Julián Bustelo, co patrón maior da Confraría de Pescadores “Virxe do Carme”, Miguel Ángel Iglesias, así como con membros da Corporación municipal, coa finalidade de recoller as demandas do sector e analizar a convocatoria de subvencións que o ente provincial ten aberta ata o 19 de abril.
Segundo fixo saber a deputada a estas subvencións provinciais (que anunciamos os días pasados dende este medio) pódense acoller confrarías e agrupacións marisqueiras e están destinadas a financiar a actividade dos pósitos. Contan cunha liña de 500.000 euros á que este ano se une outra de 150.000 máis para o desenvolvemento de festas de exaltación dos produtos pesqueiros.
