A casa da cultura de Boiro acolle ata o 26 de abril unha ampla variedade de actividades culturais que comezaron no 8M, Día da muller, abrindo a programación coa obra de teatro familiar, Monstros. O parque da Cachada será testigo ata finais de abril dunha serie de obras con distintos temas en común relacionados coa identidade de xénero.
Este, venres 22, estréase a obra Antón, un neno diferente, que conta a historia dun neno distinto aos habitantes da súa vila. Os veciños culpaban a Antón dos seus males e acabaron por botalo fora da vila cando a variola os infectou a todos menos a el. Desterrado, comeza a súa viaxe na que se atopa cun home misterioso e cunha chea de personaxes da tradición oral galega que lle concederán a Antón tres desexos. Na fin de semana, tras a obra infantil proxectarase tamén o filme “20.000 especies de abejas”, gañador de tres premios goyas, dirixido por Estibaliz Urresola Solaguren e protagonizado por Sofía Otero. Nel relátase a historia de Cocó, unha crianza de oito anos de idade que non se sinte identificada co nome que lle puxeron ao nacer, Aitor. Nunhas vacacións
que fai coa súa familia á casa materna irá descubrindo pouco a pouco quen é, causando unha gran confusión na súa nai, na súa avóa e na súa tía, que terán que enfrontarse aos seus maiores medos ao verse fronte a eles, abrindo feridas do pasado para intentar curalas. Un filme feito con moita sensibilidade e cariño para concienciar e para darlle voz e importancia a temas que en moitas ocasións pasamos por alto.
Na seguinte semana de Abril, o venres 5, presentarase a obra “Testosterona” protagonizada polo escritor e xornalista Cristian Alarcón e dirixida pola actriz e directora Lorena Vega. Unha obra innovadora tanto estética coma narrativamente que experimenta o desconcerto dun cativo inxectado coa hormona que lle da título á obra e que combina teatro, danza, performance, videoarte e sons que nos farán vivir a ficción do xeito máis real posible.
O domingo continuará coa proxección do clásico Billy Elliot, onde poderemos lembrar a historia dese fillo de mineiros que, en plena folga, decide saltar as clases de boxeo que lle impuxera seu pai e comezar a facer ballet.
As seguintes semanas continuarán con máis obras e filmes como Uno para todos, Apaga o candil ou Deadpan Karaoke. Todas nesta mesma liña temática de xénero e inclusividade, con historias moi necesarias e que merecen ser contadas. (Antía Pereira)
