A concelleira de Servizos Municipais de Ribeira, Tania Redondo e a concelleira de Medioambiente, Antía Alberte, achegáronse este xoves 21 de marzo á praia de Coroso, onde axentes ambientais están a delimitar a zona de aniñamento da píllara das dunas para evitar a perturbación dos niños.
Segundo indicaron as edís, o Concello está traballando en colaboración coa Dirección Xeral de Patrimonio Natural e os membros do grupo de investigación que, dende a Universidade de Santiago, traballan coa píllara das dunas co propósito de “asegurar a viabilidade da poboación galega desta ave nos areais do municipio”.
A concelleira de Servizos Municipais, destacou que “á hora de realizar a limpeza e rozas no entorno dos areais, estanse a seguir as indicacións da Universidade e dos axentes ambientais para respectar o hábitat da especie e perturbala o menos posíbel”.
A maiores, co propósito de fomentar a educación ambiental e a sensibilización da comunidade respecto desta especie, o Concello organizou xunto a USC e os axentes de Conservación a impartición dunha charla dirixida o público xeral acerca da píllara das dunas e, sobre todo, da relevancia do territorio ribeirense para a conservación da poboación galega, incidindo na busca de convivencia entre uso humano das praias e mantemento da biodiversidade asociada a elas.
