A Casa da Cultura Antón Avilés de Taramancos, en Noia, vai acoller o vindeiro venres 22 de marzo a presentación novo libro do músico, comunicador e escritor coruñés Xurxo Souto: o libro Somos un pobo de artistas. O método Luísa Villalta. O acto, que comezará ás 20.30 horas do venres, está organizado pola Asociación Cultura Barbantia, a editorial Xerais, o xornal La Voz de Galicia e o Concello de Noia. Intervirán na cita o escritor e profesor local Xerardo Agrafoxo (Barbantia), o músico noiés Abraham Romo (neto do tamén músico Prudencio Romo, membro de Los Tamara), o concelleiro de Cultura José Pérez e máis o alcalde de Noia, Santiago Freire. No marco da dita tamén se dará a coñecer o suplemento cultural A Voz de Barbantia, número 193, que sairá ao día seguinte, sábado 23, con La Voz de Galicia.
Somos un pobo de artistas (Xerais) ten como punto de partida o libro O outro lado da música, a poesía de Luísa Villalta, a poeta homenaxeada este ano nas Letras Galegas. Nesta obra, a poeta puxo en valor a mutua atracción que senten entre si ambas as dúas artes. Seguindo o seu método, Souto “penetra na selva vizosa da música galega contemporánea para procurar esa unidade primixenia”, procurándoa “especialmente nas marxes, territorios case invisíbeis para o gran público, onde medra cada día o poder da creatividade”.
—
