O alumnado do Obradoiro de Emprego Tahume IX, posto en marcha polos Concellos de Porto do Son e Ribeira, iniciou a súa actividade co propósito de comezar a aplicar os coñecementos adquiridos nos últimos meses.
As especialidades impartidas este ano son: Actividades auxiliares en viveiros, xardíns e centros de xardinería e Actividades auxiliares en conservación e mellora de montes.
Este programa está dirixido a mellorar a ocupabilidade das persoas desempregadas e abordar de xeito efectivo as necesidades de emprego dos ditos municipios do Barbanza.
Entre as tarefas desenvolvidas atópase a limpeza e acondicionamento do parque periurbano de San Roque, en Ribeira,
Ademais, as e os participantes en Tahume IX participaron e colaboraron nas prácticas do alumnado do Certificado de Profesionalidade de Habilitación para a Docencia en grados A, B e C do Sistema de Formación Profesional.
A maiores, os días pasados, para completar a súa formación, visitaron a sede de AMBAR en Frións (Ribeira), onde foron recibidos polo voluntario da entidade e experto en agricultura ecolóxica Manolo González, que lles mostrou o traballo que se está a levar a cabo no invernadoiro da asociación inclusiva.
O alumnado da novena edición de Tahume (20 persoas demandantes de emprego, 10 por cada un dos concellos organizadores) conta coa axuda dun director de obradoiro, dous mestres para ambas especialidades e un titor.
