O presidente da Deputación da Coruña, Valentín González Formoso, comprometeuse a que a Administración provincial acometerá un proxecto de humanización no primeiro tramo da DP-3404, en Outes. Formoso reuniuse recentemente co alcalde dese concello, Manuel González, e co segundo tenente de alcalde, José Antonio Caamaño, que lle presentaron unha memoria que recolle as actuacións necesarias para renovar o inicio da estrada provincial. Este primeiro tramo da vía correspóndese coa rúa da Vila, dentro do casco urbano de Outes.
A actuación afectará aos 240 metros iniciais, entre a avenida de Fisterra e a rúa do Poeta Añón. Contémplase a demolición das beirarrúas actuais e parte do pavimento, co fin de anchear a zona destinada aos peóns, que pasará a ser do dobre que a actual. En concreto, do metro que ocupan as beirarrúas a cada lado da rúa na actualidade, pasarase a un ancho de dous, pavimentándose con baldosa de formigón vibrado e contándose cun bordo de granito de 25 por 15 centímetros con canto biselado.
Na memoria tamén figura que os traballos servirán para renovar os servizos de abastecemento de auga, de saneamento e de recollida de pluviais. As maiores, as luminarias actuais serán substituídas por unhas novas, e o firme da zona de tráfico rodado fresarase e repoñerase cunha capa de aglomerado en quente de 6 centímetros de espesor. O proxecto incluirá a instalación de novo mobiliario urbano, entre o que se contarán 4 xardineiras, 4 bancos, 3 papeleiras e 3 estruturas para cubrir os colectores de residuos.
Os traballos contarán cun orzamento de licitación próximo aos 348.000 euros e cun prazo de execución de 6 meses.
O alcalde e o tenente de alcalde tamén aproveitaron a xuntanza para presentarlle ao presidente provincial outros proxectos que o Concello de Outes ten intención de impulsar, entre os que figura un estudo previo para a mellora da seguridade viaria na zona do porto do Freixo, consistente tamén na ampliación das beirarrúas e a renovación do firme nun tramo de 200 metros.
