A sala de exposicións do Auditorio de Rianxo dará acollida este sábado, ás 18.00 horas, á inauguración dunha nova mostra de arte naíf da artista holandesa afincada no concello Karin Kuijper. Na apertura da mostra, titulada Sentimentos (coa que a artista mostra ao público da nosa comarca pezas inéditas nunca expostas antes), o grupo local Barahunda porá a vertente musical.
A exposición estará aberta do 02 ao 30 de marzo. Os horarios de visita son os luns de 09.00 a 14.30. De martes a venres de 09.00 a 21.00. Sábados de 16.30 a 21.00 h.
A holandesa Karin Kuijper, establecida en Rianxo dende hai 13 anos, naceu en Utrecht, nos Países Baixos (Holanda).
No ámbito artístico, é autodidacta, carecendo dunha formación académica específica. Define o seu estilo dentro do ámbito do naíf, caracterizado pola súa inxenuidade e espontaneidade, onde o colorido intenso con brillos e contrastes, xunto cunha técnica escasa, son trazos distintivos. En moitos aspectos, a súa obra recorda ou inspira-se na arte infantil.
Comezou a pintar arredor do 2008, no seu país natal, Holanda, e tivo a súa primeira exposición pública en Galicia no ano 2014 e continuando ata a actualidade realizando exposicións en diferentes espazos.
