Veciños de varias rúas do centro de Ribeira denuncian que nos últimos días producíronse varios roubos en coches, así como pequenos furtos que sementaron a inseguridade nesta zona. Unha das vítimas foi o propietario dun turismo ao que lle rebentaron unha lúa da parte de atrás coa intención de entrar no vehículo e apoderarse do que houbese no interior. Con todo, ao romper o cristal saltou a alarma, que escorrentou ao delincuente, que finalmente se tivo que marchar cunha man chea de nada e outra cousa de ningunha.
Segundo recolle La Voz de Galicia os roubos están a cometerse na contorna das rúas Valle-Inclán, avenida Romero Ortiz, Novoa Santos e rúa Toxo. Todo parece indicar que se trata dun delincuente habitual.
