Arousa Norte e a Asociación Cultural Alberto Romero asinan un convenio de colaboración

O presidente da Mancomunidade de Municipios Arousa Norte e alcalde de Ribeira, Manuel Ruiz, e o presidente da Asociación Cultural Alberto Romero, Santiago García, procederon esta mañá á sinatura dun convenio focalizado na colaboración, impulso, difusión e promoción das actividades creadas polo referido colectivo.

A Asociación Cultural Alberto Romero ten como fin principal a promoción da cultura audiovisual a través do seu Certame de Curtas Alberto Romero, o cal se desenvolve no eido dos Concellos pertencentes a Arousa Norte e que conta con moi boa acollida entre o público en xeral.

Desde a Mancomunidade comprométense con este convenio a colaborar na realización do proxecto IV Certame Audiovisual de Curtas Alberto Romero, no cal participan desde estudantes de Primaria ata Bacharelato, ademais de contar cunha categoría para usuarios dos centros dirixidos a persoas con diversidade funcional e outra categoría libre aberta a todos aqueles que desexen participar a nivel de toda Galicia. Tal e como sinalou Santiago García, unha decisión que se tomou por “demanda popular” e que supón “un bo incentivo para que xente de fóra veña a coñecer a nosa comarca.”

Segundo manifestou a xerente da entidade supramunicipal, Irene Maneiro, este acordo enmárcase dentro das liñas estratéxicas que se contempla para o 2020, resultando “importante contar con profesionais, entidades e asociacións culturais que xa traballan no territorio, apostando así por unha implicación de proxectos culturais cos que consolidar unha proposta de turismo creativo.”

Pola súa parte, o presidente da nomeada asociación, Santiago García, anunciou que a gala se celebrará o 29 de febreiro, ás 19.00 horas, no Auditorio municipal de Rianxo. Entre as novidades deste ano figuran a duplicación do número de clases audiovisuais que se efectuaron na comarca, unha sesión de clases dedicadas a diversidade funcional, ampliación da categoría de Primaria e reparto das dúas modalidades escolares. Respecto a isto último, precisou que “agora Primaria vai todo xunto e ESO  e Bacharelato van na categoría de Secundaria.” En total realizáronse 34 inscricións, sendo a quenda de deliberación por parte do xurado para escoller os gañadores, mentres que o equipo técnico se atopa inmerso na posta en escena da gala. Así, repartiranse 1.200 euros entre os catro premios existentes, un por cada modalidade.

Na sinatura do convenio tamén estiveron presentes o alcalde de Rianxo, Adolfo Muíños, así como Estefanía Pérez, Montse González e Vanesa Ordóñez -quen exercerá de presentadora da gala-, todas elas integrantes da Asociación Cultural Alberto Romero.