Nunca foi España un país de gran acollida para a maioría de aqueles que, por circunstancias persoais de diverso tipo, a solicitan. Quen llo ía dicir a unha nación da que, secularmente, migraban -e aínda seguen a migrar- milleiros de compatriotas, na súa maior parte na percura dun traballo digno e ben remunerado que aquí non atopan malia ser España deficitaria en man de obra. Boa proba é que Buenos Aires, a capital arxentina, segue a ser considerada a quinta provincia galega.
España sempre estivo lonxe da media europea en concesións de asilo. Máis os datos que atinxen ao pasado ano 2023 non deixan nengún tipo de dúbidas: o ano con máis peticións de asilo -con 163.220 persoas solicitantes- tamén foi o ano no que España retrocede en concesións de asilo, segundo informa a este xornal a Comisión Española de Axuda aos Refuxiados (CEAR). E se nos países da Unión Europea a taxa media de recoñecemento é do 40%, durante o pasado ano España concedeu o asilo a só 12 de cada 100 persoas que o solicitaron.
Persoas, é importante non esquecer que falamos de persoas que piden proteción. Case que o 80% desas persoas son nacionais de Venezuela, Perú e Colombia; en torno ao 20% son nenas e nenos, e o 47% -case a metade da cifra sinalada- son mulleres.
Un ano máis, enfrontándose á ilegalidade durante meses diante da alarmante falta de citas; un ano máis, lembra a CEAR, aumentaron as solicitudes pendentes de resolución, con máis de 190.000 persoas agardando unha decisión da que depende a súa vida; e un ano mñais, as persoas nacionais de países coma Colombia ou Senegal, ven como unha inmensa maioría das sñuas solicitudes son rexeitadas (94% e 83% respectivamente) malia as graves ameazas aos derfeitios humanos ás que se enfrontan.
Porque as autoridades políticas, se ben falan de aplicar medidas para unha migración regular, a realidade é que non paran de lles pór obstáculos.
CEAR esixe por activa e por pasiva, que, como contempla a Lei de Asilo, sexa posible solicitar asilo en embaixadas e consulados, coa aplicación dun ominoso silenzo administrativo incomprensible para os afectados.
Compre activar máis vías legais para salvar a vida de milleiros de persoas que, por outra banda, virían moi ben a un país, España, que precisa de milleiros de traballadores cos que ocupar a falta de remuda nas empresas de toda caste.
Esquecemos moi rápido a resposta que algúns dos paìses citados deron aos milleiros de españois -entre eles moitos galegos- que por causas políticas, sociais ou laborais, arribaron ás súas costas en demanda dunha axuda que non se lles negou. A resposta aquí non é a mesma que aló lles deron aos nosos antergos.
…
