O Concello de Boiro comezou as obras para a mellora dun camiño rural que vai dende Pomar do Río a Enseño, na parroquia de Cures. O alcalde, José Ramón Romero, e o concelleiro de Urbanismo e Obras, Luis Ruiz, visitaron esta mañá o lugar para coñecer como se están a executar as obras.
Trátase dunha obra de 102.944,84 euros mediante a que se vai renovar o firme existente, canalizando a auga en superficie para a súa eliminación; así como a canalización das augas fecais de vivendas existentes nesa zona e que so contan con fosa séptica. Tamén se vai regularizar a sección libre do camiño entre os 4 e os 4,5 metros de sección de vía, con sumidoiros laterais e canalización de pluviais para a recollida de auga da choiva.
Para levar a cabo esta actuación o Concello de Boiro recibe da axencia AGADER (Consellería de Medio Ambiente da Xunta de Galicia) unha subvención por importe de 62.740,10 euros mediante as axudas para actuacións en camiños rurais no período 2026-2027, co-financiadas co Fondo Europeo Agrícola de Desenvolvemento Rural (FEADER) no marco do Plan estratéxico da PAC 2023-2027.
