A Vía Querinissima, ruta cultural e turística transnacional que recrea, por mar e terra, a épica viaxe realizada entre 1431 e 1433 polo mercador e navegante veneciano Pietro Querini ten moita relación con Galicia, pois o territorio galego non é unha simple paraxe de paso, senón un dos puntos clave onde o propio Pietro Querini estivo en persoa en 1431, recalando en Muros e mesmo visitando Compostela para ver o sepulcro do Apóstolo. Atendendo a isto, distintas autoridades, asociacións e entidades dos dez países que conforman a Asociación Vía Querinissima veñen de declarar a Galicia como zona de toda Europa onde máis se están concretando iniciativas de tipo cultural e turístico respecto á Vía Querinissima. Este recoñecemento tivo lugar durante a conferencia internacional “Identidade, diálogo e perspectivas: unha viaxe europea entre a cidadanía e as institucións”, e cerimonia de presentación do certificado oficial que designa como Itinerario Cultural Europeo esta ruta establecida polo navegante veneciano Pietro Querini no século XV.
O presidente da Asociación de Concellos do Camiño da Ría de Muros Noia e da Ría da Estrela, Luís Oujo, participou o pasado venres neste acto, celebrado no Pazo Ducal de Venecia. Durante a súa intervención ante o plenario da asociación, Oujo puxo en valor a epopeia de Pietro Querini e a súa peregrinación dende o porto de Muros ata a catedral de Santiago.
Oujo aproveitou para expoñer as distintas accións que se están levando a cabo dende a Asociación de Concellos do Camiño da Ría de Muros Noia e que deixan de manifesto que Galicia é a zona de Europa onde se están concretando máis iniciativas de carácter cultural y turístico de maior relevancia dentro da Vía Querinissima. Entre outras, salientouse: a estrea no Coliseo Noela (Noia) da premier do espectáculo de danza “Expedición Querina” (Escola de Danza Oitos- Noia, que tamén chegou a escenarios de Italia e Noruega). Os avances na segunda parte do documental “O Camiño Esquecido”, con gravacións xa realizadas en Creta, Venecia, Galicia e Noruega. A edición do libro “O itinerario da peregrinación de Pietro Querini (1431) de Muros a Santiago de Compostela”, editado en galego, inglés e italiano. As visitas guiadas sobre a viaxe de Pietro Querini que realizan dende a Asociación Muros Auga e Sal. E a máis importante, a consolidación da ruta de peregrinación por mar dende Baiona ata a Ría de Muros Noia, seguindo o itinerario de Pietro Querini, que se levan celebrando con gran éxito nestes seis últimos anos e coa participación de navieras como Sailway e Jules Verne Náutica, do Monte Real Club de Yates de Baiona e da Asociación de Clubs Náuticos de Galicia.
Os Itinerarios Culturais Europeos son unha iniciativa do Consello de Europa para crear un vínculo entre a cidadanía europea e o seu patrimonio cultural. Trátase de rutas entre lugares de especial interese histórico e turístico que promoven o enriquecemento mutuo, o intercambio e fan conciencia dunha identidade europea común. Algo que quedou patente en 1987, data na que o Camiño de Santiago se converteu na primeira ruta en conseguir esta distinción. A incorporación agora do Camiño da Ría de Muros Noia supón a segunda ruta xacobea e a primeira na que se inclúe un camiño marítimo.
A ruta marítima e terrestre atravesa Creta, as cosas de España e Portugal, para logo estenderse por Noruega, Suecia, Inglaterra, Alemaña, Suíza e Austria até chegar a Venecia. O treito galego da Vía Querinissima está integrado polo camiño de peregrinación de Muros a Santiago de Compostela, que Querini deixou perfectamente documentado.
