A asociación inclusiva Amicos pon en marcha en Boiro un curso de iniciación ao mundo da música electrónica e a mestura en directo. A formación, denominada Performance Musical e Mestura en Vivo, impartirase do 23 ao 27 de novembro no marco do programa Inserta2 Ribeira, coa colaboración do coñecido DJ Matrek.
As sesións desenvolveranse en Esencia DJ Academia Profesional, o espazo de formación de Matrek situado en Barraña, en horario de 10.00 a 13.00 horas. Durante unha semana, un grupo reducido de participantes terá a oportunidade de familiarizarse cos equipos de son analóxicos e dixitais, aprender técnicas de mestura e ecualización, traballar a presenza escénica e coñecer como resolver posíbeis incidencias técnicas durante unha actuación.
Segundo informa Amicos, será “unha formación eminentemente práctica que busca achegar novas habilidades aos participantes e preparalos para dinamizar festas locais, centros cívicos, asociacións e actividades de ocio inclusivo”. Asemade, a gran proba final da formación será un concurso no que os participantes
poderán demostrar todo o aprendido. A persoa gañadora terá a oportunidade de pinchar música en directo xunto a DJ Matrek durante a novena edición do Festiritititi de Amicos, que se celebrará o vindeiro 3 de decembro.
Inscricións abertas
O curso está dirixido a persoas en situación de desemprego, con discapacidade e/ou en risco de exclusión social que queiran ampliar as súas competencias e explorar novas oportunidades laborais.As persoas interesadas en participar poden solicitar máis información ou inscribirse a través dos teléfonos 682 516 278 e 627 364 054, ou dos correos electrónicos inserta2@amicos.org e labora@amicos.org.
A iniciativa forma parte de Inserta2 Ribeira, un programa que combina orientación laboral, formación e acompañamento individualizado para favorecer a inclusión sociolaboral das persoas que atopan maiores dificultades para acceder ao mercado de traballo. A través de propostas adaptadas ás súas capacidades e intereses, Amicos busca achegar novas ferramentas e oportunidades de futuro, conectando a formación coas posibilidades laborais da contorna.
Inserta2 Ribeira enmárcase no programa +Empleo, impulsado pola Fundación La Caixa e cofinanciado polo Fondo Social Europeo Plus (FSE+).
