Noia conmemorará o 25N cunha lectura institucional no Coliseo Noela e actividades ata o 19 de decembro

19 Novembro 2026

O Concello de Noia conmemorará o Día Internacional para a Eliminación da Violencia contra as Mulleres cun programa que implica os centros educativos, as farmacias e os espazos culturais da vila. O acto central será o mércores 25 de novembro, ás 11.45 horas, coa lectura da declaración institucional diante do Coliseo Noela. Participará alumnado de secundaria dos centros educativos e gardarase un minuto de silencio polas vítimas da violencia de xénero.

“Queremos que o 25N estea presente nos lugares polos que pasa a vida da vila, desde as aulas ata as farmacias. A prevención comeza cando aprendemos a recoñecer a violencia, tamén cando se manifesta en forma de control ou de medo”, sinala a concelleira de Igualdade, Chelo Martínez.

A campaña de sensibilización Noia di non á violencia de xénero desenvolverase nas farmacias da vila. O Casino de Noia acolle, do 13 de novembro ao 7 de decembro, a exposición Ecos de Kim, do alumnado do IES Virxe do Mar. Ademais, a Casa do Concello iluminarase de cor morada do 20 ao 29 de novembro.

O luns 23 de novembro, Montse Fajardo impartirá a charla O Padroado de protección ás mulleres: a institucionalización da violencia contra as mulleres no Coliseo Noela, dirixida ao alumnado de 4.º da ESO e 1.º de Bacharelato. Ás 20.30 horas ofrecerá unha segunda sesión, aberta ao público xeral, no Casino de Noia.

O martes 24, o alumnado de Educación Infantil dos centros educativos participará no contacontos teatralizado Daniel e Daniela.

O mércores 25, ademais da lectura institucional e do minuto de silencio, haberá un photocall baixo o lema Noia di non á violencia de xénero. Entre as fotografías participantes sortearanse seis vales de 50 euros. Ás 19.00 horas, o alumnado do IES Virxe do Mar lerá poemas da exposición Ecos de Kim no Casino de Noia.

“O minuto de silencio é un momento para lembrar as vítimas. Tamén queremos que quen estea a vivir unha situación de violencia saiba que pode pedir axuda e que en Noia ten un lugar ao que acudir, o Centro de Información á Muller”, engade Martínez.

O sábado 5 de decembro, Metanoia Arte Suave impartirá unha actividade de nocións básicas de defensa persoal no antigo Ximnasio Muiños. Haberá unha quenda de 11.00 a 12.00 horas para persoas de 10 a 15 anos e outra de 12.00 a 13.00 horas a partir dos 16 anos. O prazo de inscrición remata o 3 de decembro.

O domingo 13 de decembro, o Casino de Noia acollerá un obradoiro de defensa persoal para mulleres, de 10.00 a 14.00 horas. O prazo de inscrición remata o 10 de decembro. As inscricións para ambas as actividades tramítanse no Centro de Información á Muller (CIM), no 981 828 011 ou en cim@concellodenoia.gal.

A programación pecharase o sábado 19 de decembro, ás 20.00 horas, coa representación de As damas de Ferrol, de Teatro Noroeste, no Coliseo Noela. A función forma parte do Circuíto en Igualdade da Deputación da Coruña e a entrada será gratuíta ata completar a capacidade da sala.

Outros artigos

Publicidade

Revista en papel

Opinión

“Ameazas de bombas para os escolares galego”. Antón Luaces

“Ameazas de bombas para os escolares galego”. Antón Luaces

Unha trintena de centros escolares públicos e privados galegos recibiron onte, mércores, cadanseu correo electrónico con esta expresiva mensaxe: "Si desea salvar la vida de los estudiantes, abandone el edificio". Con educación e perfecto castelán, mais cun ton...

“Pensar doe”.  Xosé A. López Silva

“Pensar doe”.  Xosé A. López Silva

.Hai xa bastantes anos insistíalle eu a un alumno que se atascara nunha tradución do latín: «Pensa, pensa!». O rapaz moveu a cabeza e, ao cabo duns segundos, estoupou, o pobre: «Pensar doe, profesor!». Durante moito tempo contei aquela resposta como unha simple...

O Barbanza
Resumo de privacidade

Esta web utiliza cookies para que podamos ofrecerche a mellor experiencia de usuario posible. A información das cookies almacénase no teu navegador e realiza funcións tales como recoñecerche cando volves á nosa web ou axudar ao noso equipo para comprender que seccións da web atopas máis interesantes e útiles.