O conselleiro de Sanidade, Antonio Gómez Caamaño, resaltou hoxe que “a ampliación da hospitalización a domicilio, desde hoxe, a cinco novos concellos da Área Sanitaria de Santiago de Compostela e Barbanza permite completar a cobertura do 100 % dos 46 concellos que a compoñen”.
Así o indicou o conselleiro de Sanidade xunto aos 15 vehículos dos que farán uso as/os profesionais da asistencia domiciliaria. No acto, na entrada do Hospital Gil Casares en Compostela, tamén participaron a delegada territorial da Xunta na Coruña, Belén do Campo, o xerente do Servizo Galego de Saúde, Luis León, e o xerente da área sanitaria, Ángel Facio.
Gómez Caamaño puxo de relevancia o traballo do persoal de hospitalización a domicilio (HADO), xa que “a atención sanitaria combina o acompañamento desde o coñecemento do contorno e das circunstancias de cada paciente”, engadiu, apuntando que a Área de Santiago de Compostela e Barbanza conta xa con 9 equipos de hospitalización a domicilio, integrados cada un deles por un médico e dous profesionais de enfermería. En total, sumando os postos de xefatura de servizo e supervisión, o servizo está composto por 31 profesionais.
Con este incremento, incorpóranse a este servizo tamén os concellos de Muros, Carnota, Outes, Santa Comba e Mazaricos.
Gómez Caamaño resaltou “o avance substancial realizado polo Servizo Galego de Saúde porque, hai apenas catro anos, o servizo na área santiaguesa cubría aproximadamente a metade do seu territorio e o 60 % da poboación, e co novo equipo que comeza a traballar no día de hoxe, acádase o 100 %”.
Ademais, o conselleiro de Sanidade adiantou que “en 2027 está previsto incorporar un décimo equipo na área sanitaria de Santiago e Barbanza para atender exclusivamente as persoas que residen en centros sociosanitarios”.
