A iniciativa, cofinanciada con fondos europeos, está dirixida a vivendas unifamiliares con horta ou parcela para optimizar a xestión dos residuos orgánicos.
O Concello de Ribeira vén de poñer en marcha unha nova campaña de fomento da compostaxe doméstica a través da cal distribuirá de forma gratuíta un total de 110 composteiros entre as vivendas unifamiliares do termo municipal. O proxecto busca incrementar a eficiencia na xestión dos residuos locais e conta co cofinanciamento da Unión Europea ao abeiro do programa Galicia Feder 2021-2027.
Poderán optar a un destes colectores as persoas residentes en vivendas illadas que dispoñan dunha parcela ou horta cunha superficie mínima de 25 metros cadrados. As solicitudes xa se poden formalizar por dúas vías: en liña, escaneando o código QR presente nos carteis informativos da campaña, ou ben de xeito presencial acudindo á oficina municipal de Atención Cidadá.
Os recipientes facilitados contan cunha capacidade de 400 litros e están deseñados para a súa colocación no exterior da vivenda. Para acadar un óptimo proceso de descomposición, recoméndase situalos directamente sobre a terra —facilitando así a entrada dos microorganismos descompoñedores— e nun lugar sombreado e ao resgardo do mal tempo, preferentemente baixo unha árbore de folla caduca.
Con esta campaña, o goberno local persegue salientar os beneficios ambientais, económicos e sociais que achega a autoxestión dos biorresiduos. A iniciativa permite, ao mesmo tempo, recuperar e modernizar un costume fondamente arraigado no agro galego: o aproveitamento dos restos orgánicos, agora mediante un formato máis hixiénico, cómodo e eficiente que reduce a cantidade de lixo xerada dende a orixe.
