A agrupación de jazz Pablo Sax Cuarteto vai presentar o seu novo traballo, Selene, este sábado no Coliseo Noela. Será, en palabras do Concello, “unha proposta que combina composición e improvisación, baixo a inspiración da Lúa que lle dá nome ao traballo”.
Pablo “Sax” F. Sinde estará acompañado por Pablo P. Sanmamed ao contrabaixo, Alejandro Vargas ao piano e percusións e Sergio González á batería. Xuntos ofrecerán un repertorio con composicións propias e obras de grandes referentes como Coltrane, Mingus ou Monk.
Como dixemos, a cita é sábado 10 de outubro ás 20.30 horas, no Teatro Coliseo Noela.
A entrada terá un custe de cinco euros máis gastos de xestión, en Ataquilla.com e no teatro o propio día da actuación.
Pablo Sax (F. Sinde) naceu en Renkum – Oosterbeek (Holanda) en 1967, fillo de emigrantes galegos.
Cando tiña apenas seis anos, a súa familia retornou a Galicia, instalándose na nosa comarca.
O seu disco máis recente titúlase Selene, un álbum autoeditado e gravado integramente en directo no emblemático Filloa Jazz Club da Coruña. O repertorio inclúe pezas orixinais como Ornette bebe té verde (Ornette Coleman), Esperpento en Re menor (Valle-Inclán) ou Klee (Paul Klee). Tamén hai clásicos modernos de Charles Mingus (Reincarnation of a Lovebird), Eric Dolphy (Serene) e John Coltrane (Miles’ Mood)
