Co obxectivo de promover a actividade deportiva no municipio, o Concello de Ribeira convoca as axudas para clubs e deportistas individuais ou por parellas para este 2026 por un importe total de 164.000 euros (150.000 euros para clubs e 14.000 para deportistas).
O dinamismo dos clubs poderá ser subvencionado, ata un máximo do 70% do gasto efectuado e acreditado, co límite de 15.000 euros da organización de actividades deportivas, así como a participación en competicións deportivas sexan ou non federadas.
As actividades subvencionadas deberán ter lugar no período comprendido entre o 1 de xaneiro e o 31 de decembro de 2026.
No que respecta a deportistas individuais ou por parellas, establécese unha liña de subvención por un importe máximo de 1.000 euros cada bolsa para aqueles que destacaran na súa faceta competitiva no 2026.
En ambos supostos, as solicitudes deberán presentarse de maneira telemática a través da sede electrónica municipal no prazo dun mes dende o día seguinte ao da publicación da convocatoria no Boletín Oficial da Provincia da Coruña, no 28 de outubro. Xunto cos anexos debidamente cumprimentados, deberá acompañarse copia dos calendarios e certificados federativos que correspondan, así como os certificados de estar ao corrente no cumprimento das obrigas tributarias e fronte á Seguridade Social.
As bases completas están dispoñíbeis na web municipal.
