O sábado celebrouse a cuarta e última etapa da Regata Alca cun espectacular percorrido polo interior da ría de Arousa de 12 millas. O Ziralla, do RCN de Sanxenxo, fíxose coa súa división grazas a un segundo posto na última manga. O Fixius, do R.C.R Galicia, con outro primeiro, dominou a súa clase con total autoridade.
Os partes meteorolóxicos mostraban unha situación típica desta época do ano, ceos con nubes e claros e ventos de entre 6 e 8 nós, condicións perfectas para a disputa da cuarta e definitiva manga da Regata Alca, que desde o pasado 12 de setembro lévase disputando na Pobra do Caramiñal.
Con estas condicións o comité decidiuse por un percorrido costeiro dunhas 12 millas con saída nas inmediacións da Ostreira, nas proximidades da enseada pobrense.
Na División 1, o Corsario Thunder, de Jorge Durán, dominou aos seus rivais como facía tempo que non pasaba, deixando a segunda posición para o Ziralla, de Ramón Barreiro, situación que lle chegaba para facerse co primeiro posto na xeneral desta clase.
Na División 2, o Fixius, de Miguel Perez-Lafuente volveu ensinarlle a popa a todos os seus rivais e pechou esta regata con 3 primeiros en 3 probas disputadas. Segundo posto na cuarta xornada e na xeneral para o Mauritania, do Club Náutico Arousa Norte.
Resultados finais VIII Regata Alca
División 1
1o – ZIRALLA – Ramón Barreiro – R.C.N de Sanxenxo
2o – CHISPETRÉN – Jesús Iglesias – C.N. Arousa Norte
3o – GALOPÍN – Manuel Franco – C.N.D de Riveira
División 2
1o – FIXIUS – Miguel Pérez-Lafuente – R.C.R Galicia.
2o – MAURITANIA – Ángel Romasanta – C.N. Arousa Norte
3o – SALUT – José Ignacio Salgado – Independente
