A escritora noiesa Lorena Neu Louro, acompañada polo tamén escritor outense Ramón Blanco Fernández, presentaron de forma conxunta o primeiro libro de Lorena, Una nueva vida, na Casa da Cultura de Lousame.
Trátase dunha obra cargada de superación, sensibilidade e esperanza, que ademais representa o inicio dunha nova etapa para a súa autora, como destacou a concelleira de Cultura, Silvia Agrafojo Filgueira, que engadiu que “a obra afonda en temas de superación, culpa, redención e segundas oportunidades”.
Lorena Louro escribiu e publicou Una nueva vida tras enfrontarse todo tipo de atrancos no mercado de traballo debido a seis discapacidades. Para ela, este libro representa “abrir unha porta nova e demostrar que as circunstancias non definen os límites dunha persoa”, sinalou nunha entrevista recente.
O libro foi publicado por Letrame Editorial e xa leva lanzadas varias edicións dende maio deste ano.
O libro narra a historia de Mario, un home que medrou protexido por un corazón fráxil e unha educación sen límites. Tras telo todo na vida —cartos, poder e privilexios—, as súas malas decisións lévano demasiado lonxe ata precipitar unha caída brutal e inevitábel.
Cando o seu corpo di que abonda e parece que non queda esperanza, o destino intervén. Aparece un rostro moi parecido, unha verdade enterrada durante décadas e dúas vidas separadas por unha decisión imposible que se reúnen no momento máis crítico. A trama revélase como un relato sobre nais que calan demasiado tempo e sobre un sacrificio silencioso cun latexo que obriga a merecer a vida.
