O Concello de Boiro e a Fundación Alcalde Varela achegan ó público a historia e o coñecemento da danza na IV edición do Mes da Danza. No marco desta festival chega á localidade do Barbanza o experto Roger Salas, unha das grandes voces da danza en España. Será este sábado 19 de setembro ás 19.00 horas no Pazo de Goiáns.
A Fundación Alcalde Varela, en colaboración co Concello de Boiro e Etérea Experience, achega a Boiro a Roger Salas, escritor, crítico e historiador de danza, para participar na IV edición do Mes da Danza.
Con máis de catro décadas escribindo en El País, Salas desenvolveu unha extensa traxectoria adicada á análise, á historiografía e á divulgación da danza e do ballet.
Baixo o título ¿Qué es el ballet? Origen e historia, Salas protagonizará un coloquio aberto ó público no que percorrerá as orixes, as figuras clave, a evolución e as principais transformacións do ballet, achegando esta disciplina desde unha perspectiva histórica e cultural.
A súa presenza en Boiro propón un espazo para escoitar, conversar e descubrir o ballet dun xeito aberto, educativo e próximo, achegando ao público os seus coñecementos e a súa mirada sobre a historia e a evolución da danza.
Na cita tamén participarán María Outeiral, concelleira de Cultura do Concello de Boiro, Bárbara Da Silva, directora xerente da Fundación Alcalde Varela.
O encontro forma parte da programación do Mes da Danza 2026, unha iniciativa do Concello de Boiro que durante o mes de setembro reúne espectáculos de compañías profesionais e agrupacións locais en distintos espazos do municipio.
A programación busca poñer en valor a danza tradicional galega como expresión de identidade e patrimonio vivo, ao tempo que incorpora outras linguaxes e formas de creación contemporánea.
Nesta edición, o Pazo de Goiáns convértese nun dos principais escenarios da programación. O encontro con Roger Salas amplía esa relación entre danza e patrimonio cunha aproximación diferente: non só contemplar a danza dende o escenario, senón tamén escoitala, coñecela, contextualizala e comprender a súa evolución.
A Fundación Alcalde Varela enmarca esta iniciativa na súa liña de traballo orientada a impulsar a cultura dende Boiro, activar o territorio e xerar novas experiencias culturais, nesta ocasión en colaboración con Etérea Experience, unha proposta que explora novas formas de achegar a danza e as artes escénicas ao público adulto a través de espazos de valor cultural.
