A Policía Autonómica de Galicia precintou as instalacións do Cámping Ría de Arousa I, emprazado a carón da praia de Cabío (A Pobra). Segundo informaron diversos medios, trátase dun peche orixinado “polo incumprimento de requirimentos administrativos” a través dos cales os responsábeis do establecemento turístico debían afrontar “unha reparcelación” e mudar a localización de varios bungalós. Desde a empresa confirmaron o precintado das instalacións.
Aos clientes que no intre do peche se atopaban no establecemento ofrecéuselles a opción de ser acollidos noutras dependencias da empresa na comarca.
A Xunta de Galicia tomou esta medida cautelar por mor de “irregularidades urbanísticas e turísticas acumuladas pola empresa xestora tras varias inspeccións”. Ao parecer, o recinto viña sobrepasando o límite de instalacións autorizadas.
