Co inicio do novo curso a Sociedade Liceo de Noia e a asociación de empresarios Noia Histórica activaron a campaña dos Sabadetes, unha iniciativa de dinamización comercial e social que inclúe sorteos, premios e campañas para impulsar a economía da vila e do concello, incentivando as compras dos negocios de proximidade.
Un dos seus principais puntos fortes son os premios en vales de compra, que as persoas beneficiadas poden trocar por produtos ou servizos nas máis de 150 empresas socias de Noia Histórica (comercio, hostalería, servizos) e que poden chegar aos 250 euros en datas sinaladas (premios especiais).
Trátase dunha iniciativa xa moi afianzada cun gran movemento económico na vila. De feito, nalgunhas edicións chegáronse a repartir máis de 9.500 € en premios ao longo do curso (na pasada edición).
Como dixemos, os Sabadetes iniciaron unha nova andaina co inicio do curso, e de feito o Liceo de Noia e Noia Histórica veñen de renovar o seu convenio de colaboración e a campaña arrancou de novo hai moi poucos días: o pasado 12 de setembro, marcando o inicio oficial da tempada de sorteos que se irá desenvolvendo ao longo dos vindeiros meses.
Podemos seguir as actualizacións semanais dos sorteos e os números premiados directamente nas redes de Noia Histórica.
