A tripulación RFGV-Ence dominou con claridade as ‘medal series’ nunha fin de semana na que asinaron sete vitorias parciais
O Pulperas do RCN Calpe finalizou en segunda posición e o Natulim do CN Sevilla remontou ata o terceiro chanzo do podio
O equipo da Real Federación Galega de Vela liderado pola patroa Carlota Hernández proclamouse este domingo campión da Regata da Muller en Vilagarcía de Arousa, proba inaugural da tempada 2026/27 da Liga Iberdrola de Vela Feminina. A tripulación anfitrioa do RFGV-Ence rubricou unha actuación impecable tras erguerse coma clara dominadora das decisivas medal series.
A xornada final arrancou pola mañá coa disputa de seis novas probas clasificatorias que serviron para cribar a frota e definir as seis embarcacións que loitarían polos postos de honra. O RFGV-Ence ratificou a súa condición de líder local rematando no máis alto da fase preliminar, escoltado polo Pulperas do RCN Calpe e por un Natulim do CN Sevilla que amosou unha notable melloría con respecto á xornada do sábado. RFGV-Wavefit, Balearia RCNP e RCNGC completaron o sexteto finalista.
Autoridade nas probas finais
Xa nas tres mangas finais polo campionato (medal races), que se disputaron baixo un vento do norte en descenso que caeu dos 15 aos 7 nós, o outro barco galego en liza, o RFGV-Wavefit de Sandra González, deu o primeiro golpe gañando a proba de apertura. Con todo, nas dúas seguintes Carlota Hernández e o seu equipo responderon encadeando dous triunfos consecutivos sen dar marxe ás súas rivais. En total, as vencedoras sumaron sete vitorias ao longo da fin de semana e fixeron podio en todas as mangas disputadas.
A segunda praza final foi para o Pulperas do RCN Calpe, comandado por Sara Momplet, mentres que o terceiro posto recaeu no Natulim sevillano de Carlota Massana trala súa remontada deste domingo. Pola súa banda, o RFGV-Wavefit quedou ás portas dos caixóns de honra nunha meritoria cuarta posición.
Tras amarrar o título, Carlota Hernández debullou as claves do éxito en augas arousás: “A primeira clave foi navegar tranquilas. Despois, anticipármonos ás situacións, falar moito sobre o que iamos facer en cada momento, ter as ideas claras e ir a por aquilo que críamos que tocaba”.
A seguinte parada da competición celebrarase do 10 ao 12 de outubro, nunha cita dobre que suporá o segundo evento do curso 2026/27 e a gran final da edición 2026, onde o Natulim chegará como líder nacional en busca do Campionato de España.
