O alcalde de Rianxo, Julián Bustelo, e a Concelleira de Política Social, Ana Vidal, enteregaron esta semana á entidade SOGAPS (Solidariedade Galega co Pobo Saharauí) os máis de 1.900€ recadados na andaina solidaria celebrada fai uns días no concello.
Bustelo e Vidal lembraron que estes fondos permiten, entre outras cousas, financiar o programa Vacacións en Paz promovido por esta entidade, un programa no que participa cada ano o Concello de Rianxo (entre outros do Barbanza) que permite que moitos nenos e nenas pasen o verán afastados das temperaturas que nestes meses se acadan nos campos de refuxiados do deserto, en Tindouf.
A andaina celebrouse o 22 de agosto, con saída e chegada na praza Castelao.
Establecéronse 2 percorridos na contorna do paseo marítimo e a senda litoral de Taragoña.
A través de Vacacións en Paz, as familias de Rianxo fanse cargo de acoller ao menor nas súas casas durante os dous meses de verán. Permite que os menores accedan a controis de saúde regulares (dentistas, oculistas e consultas xerais) que son difíciles de realizar nos campamento. O programa posibilita que a rapazada se afaste das extremas temperaturas do deserto no verán mentres aprenden e conviven nunha realidade diferente.
