Dende o Concello de Noia e a Xunta Local da Asociación Española Contra o Cancro veñen de anunciar unha nova edición da andaina solidaria Noia en marcha contra o cancro que se levará a cabo este sábado 19 de setembro co obxectivo de superar as máis de 1.300 persoas participantes da pasada edición co fin conxunto de dar apoio á loita contra a enfermidade. Engadir que a xornada contará tamén cunha actividade aberta de zumba ás 12 horas diante da Casa do Concello.
Na presentación participaron a concelleira de Servizos Sociais e Sanidade, Sandra González; a presidenta da Xunta Local da Asociación Española Contra o Cancro, Sara Lojo; a integrante da súa directiva Teresa Suárez e Belén Arroniz, en representación da asociación de empresarios Noia Histórica.
Pola súa banda, a concelleira de Servizos Sociais e Sanidade, Sandra González, salientou a importancia de que “Noia volva demostrar a súa capacidade de mobilización arredor dunha causa que nos toca moi de preto a todos e todas”, e puxo en valor unha xornada que une solidariedade, convivencia e promoción de hábitos de vida saudábeis.
A presidenta da Xunta Local da Asociación Española Contra o Cancro, Sara Lojo, animou a toda a cidadanía a participar na andaina e a contribuír a que Noia volva amosar o seu compromiso coa loita contra o cancro, co apoio ás persoas afectadas e ás súas familias e coa investigación.
A programación comezará xa pola mañá. Ás 12 horas celebrarase unha actividade de zumba aberta a todas as persoas que queiran participar diante da Casa do Concello, como antesala dunha xornada marcada pola participación e a solidariedade.
A andaina partirá ás 17 horas desde a Alameda de Noia e contará cun percorrido aproximado de 3 quilómetros, que discorrerá pola Alameda, o casco histórico e o paseo marítimo antes de regresar ao punto de partida.
O prezo da inscrición é de 8 euros para persoas adultas e 5 euros para nenos e nenas de até 12 anos. Ademais, aquelas persoas que non poidan participar pero desexen colaborar coa iniciativa poden facelo mediante o dorsal solidario.
A recollida de dorsais realizarase o propio sábado entre as 11 e as 16.30 horas na Alameda. A organización avanza tamén que haberá diferentes sorpresas ao remate da andaina.
Desde o Concello de Noia, a Asociación Española Contra o Cancro e Noia Histórica faise un chamamento á veciñanza de Noia e de toda a comarca para participar e volver encher as rúas de solidariedade e apoio á loita contra o cancro.
En canto aos puntos de inscrición, sinalar que as persoas interesadas poden formalizar a súa inscrición en 24 establecementos colaboradores de Noia e da comarca.
Noia: Mi Casa, Mundiart, El Jardín, Bazar Marucha, Chepi, Pisa Morena, María Durán, Lamas, Clavel, Rosita Moda, Lum, Anelos, Monchel, Petisco, Óptica Boa Vista, Larrondo, Rekord Sport, Casais e Calzados Viñas.
Serra de Outes e O Freixo: Bar A de Vila (O Freixo), Libraría e Agasallos Pimpiño (rúa A Capela, Outes), Decoración e Regalos Deco-lar (rúa A Capela, Outes), Ula Libraría Social (rúa A Capela) e Floristería A Xerra (avenida de Fisterra, Outes).
A inscrición tamén pode realizarse en liña a través da web da Asociación Española Contra o Cancro, así como mediante o código QR incluído no cartel oficial da actividade.
